Në vitin 2024, sipas të dhënave të INSTAT në ekonominë shqiptare numëroheshin rreth 127 mijë biznese aktive. Kjo shifër është rreth 2 mijë biznese më shumë se viti paraardhës.
Por treguesi më domethënës në këto shifra është fakti se gjysma e bizneseve në vend kanë zero të punësuar. Janë biznese vetjake, pra me të vetëpunësuar.
Armand Hasko kontabilist gjatë një interviste në Vizion Plus, për emisioni e-ZONE analizoi se ky realitet lidhet me kulturën e shoqërisë shqiptare, por edhe me strukturën ekonomike, e cila nuk bazohet në prodhim, por më shumë në shërbime.
“Shqiptarët shohin njëri-tjetrin dhe mendojnë se mund të bëj biznes kushdo. Hapin një aktivitet pa patur as një njohur ekonomike, fiskale, por as një analizë sado të vogël të tregut, për të parashikuar pritshmërinë për më tej. Mendoj se edhe numri prej 127 mijë biznese aktive nuk është real, se një pjesë falimentojnë por nuk s’regjistrohen. Paralelisht me këtë realitet punëdhënësit e mëdhenj ende nuk ofrojnë kushte dinjitoze pune, ndaj dhe shqiptarët tentojnë të bëjnë biznes individual”, sqaroi Hasko.
Shifrat e ndërmarrjeve aktive si dhe ato të nivelit të punësuarve që ofrojnë janë një tregues që thuajse nuk ndryshojnë ndër vite. Por pse kjo tendencë e pandryshuar, ku ekonomia shqiptare prodhon vetëm mikro ndërmarrje?
“Ekonomitë e shëndetshme bazohen në prodhim. Ne jemi një ekonomi që nuk prodhojnë asgjë. Ndaj dhe bizneset janë të orjetuar drejt shërbimeve. Kjo është arsyeja pse shumë prej tyre janë të bazuara në tregtinë me shumicë dhe pakicë pasi është shumë e lehtë të hapësh një biznes të tillë. Mbi të gjitha nuk kërkon shumë kapital një investim në fushën e shërbimeve, ndaj dhe individët orientohen në këtë drejtim”, tha Hasko.
Një tjetër arsye pse individët janë orientuar drejt një biznesi individual është edhe fakti se deri në fund të vitit 2029 ata janë me zero taksa.
/vizionplus.tv
