Është lançuar zyrtarisht programi strategjik EU4Municipalities II, një nismë që synon të forcojë pushtetin vendor në Shqipëri dhe të mbështesë procesin e integrimit të vendit në Bashkimin Europian.
Programi parashikon investime konkrete në bashki, rritje të kapaciteteve administrative dhe modernizim të shërbimeve publike, me qëllim përmirësimin e drejtpërdrejtë të jetës së qytetarëve.
Ambasadori i BE-së në Shqipëri, Silvio Gonzato, deklaroi se projekti synon ta bëjë qeverisjen vendore një partner aktiv në formësimin e së ardhmes evropiane të vendit.
Sipas tij, programi do të fokusohet në tre prioritete kryesore: përmirësimin e shërbimeve dhe infrastrukturës për qytetarët, nxitjen e zhvillimit ekonomik vendor në të gjithë territorin dhe forcimin e institucioneve më transparente dhe efikase.
Silvio Gonazo: Ky projekt synon që të sigurojë që qeverisja vendore të jetë partnere aktive në formësimin e së ardhmes evropiane të Shqipërisë. Ky program do të ofrojë rezultate në bazë të tre prioriteteve kryesore. E para dhe më kryesorja janë shërbimet dhe infrastrukturë më e mirë për shqiptarët. E dyta është zhvillimi ekonomik vendor, i cili mbështet çdo cep të Shqipërisë. I treti është fakti që të ketë institucione më të forta dhe më transparente. Qeverisja e mirë nis me besimin. Ne duam që këtë punë që do ta bëjmë tani ta bazojmë te suskeset e mëparshme.
Ai shtoi gjithashtu se bashkitë e vogla do të kenë vëmendje të veçantë, në mënyrë që asnjë njësi vendore të mos mbetet pas, ndërsa programi do të ofrojë një qasje të përshtatur sipas nevojave të secilës bashki.
Në fokus mbetet edhe krijimi i mundësive për të rinjtë, me qëllim që ata të qëndrojnë, të zhvillohen ose të kthehen në Shqipëri.
Silvio Gonazo: Bashkitë e vogla do të vendosen të parat, sepse asnjë bashki nuk duhet të mbetet pas. Ne duam të siguromi që çdo bashki të ketë qasje në këtë program. Ne na duhet që të kemi një qasje e cila i përshatet nevojave të çdo bashkie, ne synojmë të nxisim bashkëpunimin ndërbashkiak, pasi duke bashkëpunuar edhe ndikimi që ju do të jepni do të jetë më i madh. Në këtë drejtim është shumë e rëndësishme edhe puna e Komisionit për Reformën Territoriale dhe Administrative. Procesi i reformave duhet të udhëhiqet nga sfidat territoriale. Ky proces është një mundësi unike për të reduktuar në mënyrë efektive pabarazitë territoriale. Ekipi im do të jetë në terren për të promovuar projektin. Unë ju bëj thirrje që të mësoni nga njëri-tjetri, të ndërtoni partneritete dhe të mendoni se si të adresoni më mirë nevojat vendore veçanërisht se si të krijohen mundësi që të rinjtë shqiptarë të qëndrojnë në Shqipëri, të lulëzojnë ose të rikthehen më pas në Shqipëri.
