Kryetari i Partisë Demokratike Sali Berisha vlerësoi rezolutën e Parlamentit Evropian duke tregon në mënyrë realiste problemet me të cilat sot përballet Shqipëria. Gjatë mbledhjes së Kryesisë së Partisë Demokratike Berisha veçoi nga ky dokument qëndrimin e Parlamentit Evropian për zgjedhjet parlamentare të majit të vitit të kaluar.
“Raporti konfirmon partinë-shtet. Monstër. Partia-shtet është monstra e një regjimi, është monstra elektorale, është monstra e lirisë së qytetarëve.
Në qoftë se kërkohet një monstër në kuptimin e vërtetë të fjalës, ajo e ka emrin parti-shtet dhe ne jemi jashtëzakonisht mirënjohës për diagnozën, për konstatimin që i gjithë spektri politik i Parlamentit Europian i ka bërë situatës”, tha Berisha.
Berisha deklaroi se kjo rezolutë dënon vendimin e mazhorancës për të mos i hequr imunitetin ish-zëvendëskryeministres Belinda Balluku
“Raporti thotë, rikujton se imuniteti parlamentar është pjesë e rrjetit kushtetues të përcaktuar që të sigurojë funksionimin e mirë të institucioneve demokratike, por thekson se çdo vendim në këtë drejtim duhet të merret strikt në përputhje me përcaktimet e Kushtetutës dhe procedurat e vendosura ligjore pa ndërhyrje politike. Ja ku del Edi Rama këtu me Lubi Ballukun”, tha Berisha.
Përtej komenteve për rezoluten e Parlamentit Evropian, Berisha foli për zhvillimet brenda Partisë Demokratike. Meqënëse në rendin e ditës së mbledhjes së Kryesisë ishte miratimi i kandidaturës së vetë Berishës për postin e kryetarit të Partisë Demokratike, lideri historik i demokratëve shpjegoi arsyet pse ai po hyn në garë i vetëm.
“Partia Demokratike ka qenë, është dhe do jetë partia e garës, parti e anëtarëve të saj, e votës së tyre. Cilido. Por nuk do jetë kurrë parti e kandidaturave kallpe. Nuk krijojmë ne kandidatura. Nuk i kam thënë, nuk i kam thënë kurrë Ibsen Elezit, kandido, por rival, ka kandiduar vetë. Dhe e dëgjoj, pavarësisht çfarë thotë, po ai vetë ka kandiduar dhe ka qenë, ju e dini, ka qenë me funksione jo të vogla”, tha Berisha.
Në fund të fjalës për median, Berisha u largua nga mbledhja e Kryesisë për t’i lënë demokratët të diskutojnë pa prezencën e tij për zgjedhjet e brendshme. Ashtu siç pritej, pak minuta më vonë Kryesia njoftoi se zyrtarisht Sali Berisha është i vetmi kandidat në garën për të udhëhequr Partinë Demorkatike për 4 vitete e ardhshme.
