Kryeministri Edi Rama e nisi javën me një mbledhje të zgjeruar me grupin e deputetëve të Partisë Socialiste si dhe kabinetin qeveritar.
Takimi i zhvilluar në Pallatin e Brigadave, kishte në fokus turin “Punët për Shqipërinë” si dhe procesin e integrimit.
Për rreth dy orë, drejtuesit e qarqeve raportuan mbi çështjet dhe problematikat e dhëna nga qytetarët në zonat e tyre përkatëse, si dhe për diskutimet që kanë patur me mbështetësit e partisë socialiste.
Më tej, mbledhja e fokusua tek procesi i integrimit. Kryenegociatorja Majlinda Dhuka së bashku me Ministrin e jashtëm Ferit Hoxha, dhanë detaje sa i përket ecurisë së negociatave të anëtarësimit në union.
Porosia kryesore ishte miratimi i ligjeve që janë në përputhje me legjislacionin e Bashkimit Europian.
Kryeministri Rama ishte i fundit që mbajti fjalën, e cila zgjati rreth një orë.
Mbledhjet e zgjeruara mes grupit parlamentar dhe qeverisë tashmë po zhvillohen rregullisht çdo muaj dhe ato shqyrtojnë progresin e shënuar në nisma të ndryshme të mazhorancës, e veçanërisht ecurinë e integrimit europian.
