Irani ka paralajmëruar vendet e rajonit se do të sulmojë bazat ushtarake amerikane që ndodhen në territoret e tyre nëse Shtetet e Bashkuara ndërmarrin një sulm kundër Teheranit.
Deklarata është bërë nga një zyrtar i lartë iranian për agjencinë Reuters, pas kërcënimeve të presidentit amerikan Donald Trump për ndërhyrje, në mes të protestave mbarëkombëtare kundër qeverisë në Iran.
Sipas zyrtarit, Teherani ka informuar vende si Arabia Saudite, Emiratet e Bashkuara Arabe dhe Turqia se bazat amerikane në këto shtete do të jenë objekt sulmi nëse SHBA godet Iranin, duke u kërkuar njëkohësisht këtyre vendeve që të ushtrojnë presion mbi Uashingtonin për të shmangur një përshkallëzim ushtarak. Ditë më parë, Irani paralajmëroi gjithashtu me sulme edhe Izraelin.
Një ditë më parë, gjatë një fjalimi në Detroit, Donald Trump u bëri thirrje qytetarëve iranianë të vazhdojnë protestat.
“Të gjithë patriotëve iranianë: vazhdoni të protestoni, merrni institucionet tuaja nëse është e mundur dhe zbuloni emrat e vrasësve dhe dhunuesve që ju keqtrajtojnë”, deklaroi ai, duke shtuar se “ndihma është rrugës”.
Trump gjithashtu tha se u ka këshilluar aleatëve të SHBA-së të largohen nga Irani, duke theksuar se kjo “nuk është ide e keqe”.
Ndërpriten komunikimet Teheran–Uashington
Ndërkohë, një tjetër zyrtar i lartë iranian bëri të ditur se komunikimet e drejtpërdrejta mes ministrit të Jashtëm të Iranit, Abbas Araghchi, dhe të dërguarit special të SHBA-së, Steve Witkoff, janë ndërprerë pas kërcënimeve të Trumpit.
Sipas tij, kërcënimet amerikane po minojnë përpjekjet diplomatike, ndërsa bisedimet për takime të mundshme mes dy palëve, me qëllim gjetjen e një zgjidhjeje diplomatike për çështjen bërthamore, janë pezulluar.
