Një incident i rëndë dhune u regjistrua në kryeqytetin e Hondurasit, ku deputetja e Partisë Kombëtare, Gladys Aurora López, mbeti e plagosur rëndë pasi një pajisje shpërthyese shpërtheu vetëm disa centimetra larg kokës së saj.
Ngjarja ndodhi të enjten, teksa López po jepte një intervistë për mediat. Sipas dëshmive, një objekt rrethor u hodh papritur drejt saj, goditi pjesën e pasme të qafës dhe shpërtheu në flakë, duke shkaktuar panik mes të pranishmëve. Si pasojë, deputetja pësoi djegie dhe dëmtime në dëgjim, ndërsa disa persona të tjerë u lënduan lehtë.
López mbijetoi sulmin dhe ndodhet nën kujdes mjekësor, ndërkohë që autoritetet kanë nisur hetimet për të zbardhur rrethanat dhe përgjegjësit e ngjarjes.
🚨⚡️ #Urgent | 🇭🇳 La députée Gladys #Aurora_López a été blessée plus tôt cet après-midi lorsqu’elle a été touchée par un engin explosif lancé par des extrémistes présumés devant le Palais législatif du Congrès national du #Honduras à Tegucigalpa. pic.twitter.com/jNFnMQh2cl
— Le Monde Multipolaire (@MMultipolaire)
Sulmi vjen në një moment tensioni të lartë politik në Honduras, gjatë një rinumërimi të kontestuar të votave pas fitores së ngushtë të Nasry Asfura në zgjedhjet presidenciale të nëntorit.
Presidenti i Kongresit, Luis Redondo, urdhëroi menjëherë nisjen e një hetimi dhe kërkoi analizimin e pamjeve nga kamerat e sigurisë dhe regjistrimeve të shërbimit 911 për identifikimin e autorit. Nga ana e tij, presidenti i zgjedhur Asfura bëri thirrje për qetësi, duke deklaruar se “akte të tilla nuk duhet të ndodhin, pavarësisht motivit”.
Kreu i grupit parlamentar të Partisë Kombëtare, Tomás Zambrano, e cilësoi sulmin si një akt dhune të papranueshëm dhe akuzoi partinë në pushtet për krijimin e një klime armiqësore ndaj opozitës. Ai u bëri thirrje Forcave të Armatosura dhe Policisë Kombëtare të garantojnë sigurinë e ligjvënësve dhe të institucionit të Kongresit, duke paralajmëruar se vendi po hyn në një nga periudhat më kritike politike të historisë së tij moderne.
