Ish-kandidati i Partisë Demokratike, Aulon Kalaja, i ka cilësuar qesharake dhe si fantazi komike deklaratat e bëra nga disa përfaqësues të opozitës, të cilët kanë deklaruar se kryeministri Edi Rama do të ketë të njëjtin fat si presidenti i Venezuelës, Nicolas Maduro.
I ftuar në studion e “Quo Vadis”, të moderuar nga Pranvera Borakaj në Vizion Plus, Kalaja tha se të presësh që me Edi Ramën të ndodhë ajo që ndodhi me Maduron është një krahasim i pavend.
“Të flasësh në këtë mënyrë është si të flasësh si ‘Liza në Botën e Çudirave’. Këto janë takime rutinë të Ambasadës Amerikane. Edhe unë jam habitur nga disa eksponentë të opozitës që kanë folur si Liza në Botën e Çudirave, duke pritur që Rama të ‘paketohet’”, tha Kalaja.
Më tej, ai theksoi se nuk ka vend për krahasim mes Ramës dhe Maduro-s, sidomos sa i përket çështjes së arrestimit, pasi ndaj kryeministrit shqiptar nuk ka një urdhër-arresti ndërkombëtar.
“Rama nuk ka asgjë të përbashkët me Maduron. Së pari, për të nuk ka një urdhër-arresti ndërkombëtar. Unë gjykoj se këtu në Shqipëri, nëse amerikanët kërkojnë diçka, e bëjnë hapur, pasi politikanët shqiptarë shkojnë shpesh te Rruga e Elbasanit dhe spiunojnë njëri-tjetrin. Nuk e shoh Ramën të barabartë me Maduron, pasi ky i fundit bëri kryengritje. Rama dhe politikanët e tjerë shqiptarë reagojnë sapo u vjen mesazhi”, u shpreh Kalaja.
