Sfidat e drejtësisë së re, rritja e numrit të dosjeve në gjykata e më gjerë u diskutuan në Konferencën “30 vite partneritet dhe progress: Shqipëria, Këshilli i Evropës dhe Komisioni i Venecias”, në Tiranë.
Në ditën e saj të dytë, ku pjesë e tryezës ishin dhe përfaqësues të institucioneve të drejtësisë, kryetari i i Gjykatës së Lartë, Sokol Sadushi, ngriti shqetësimin e ngadalësimit të reformës në drejtësi.
“Pavarësisht sfidave dhe pengesave, thelbi i saj mbetet i pandryshuar, sepse reforma nuk ka dështuar. Ajo është ngadalësuar nga mungesa e vullnetit për ta zbatuar me të njëjtin idealizëm dhe integritet, me të cilin u ndërtua”, tha Sadushi.
Ndonëse pranoi se besimi i qytetarëve në drejtësi është përmirësuar ai theksoi se ka ende nevojë për përmirësime.
“Qytetari nuk kërkon drejtësi të përsosur, por drejtësi që përpiqet çdo ditë të jetë më e drejtë. Besimi nuk fitohet me fjalë, por me sjellje dhe me vendime që mbrojnë ligjin dhe dinjitetin njerëzor”, tha Sadushi.
Megjithatë vlerësimet nuk munguan. Presidentja e Komisionit të Venecias Hanna Suchocka, u shpreh se Shqipëria ka shënuar progress në këto reforma.
“Shqipëria ka bërë hap madhor drejt reformimit të gjyqësorit. Kjo është theksuar qartësisht në opinionin e Komisionit të Venecias të vitit 2016. Dhe Komisioni ka përgëzuar autoritetet shqiptare dhe ekspertët e Komisionit të Posaçëm në lidhje me përgatitjen e Reformës Kushtetuese për gjyqësorin”, deklaroi Suchocka.
Kryetari i Komisionit të Ligjeve Ulsi Manja vuri në dukje ndihmën që Kuvendi mund t’i japë gjyqësorit për të ulur numrin e dosjeve të prapambetura.
“Janë rreth 137 mijë dosje që janë ende në dyert e sistemit të drejtësisë, të cilat duhet të shpejtojnë. Megjithatë është edhe detyrë e Kuvendit që të krijojë një frymëmarrje për këto institucione në mënyrë që të arrijnë të përballojnë fluksin”, tha Manja.
Gjatë aktivitetit u theksua dhe bashkëpunimi mes aktorëve politik dhe institucioneve për të krijuar një harmoni në luftën ndaj korrupsionit./vizionplus.tv
