Në 24 orët e fundit, katër persona – përfshirë dy fëmijë, kanë humbur jetën në tri incidente të ndara gjatë përpjekjeve për të kaluar kanalin e La Mansh nga Franca në Mbretërinë e Bashkuar, raporton The Guardian.
Një incident ndodhi mbrëmjen e së martës pranë bregut të Sangattë, ku një gomone me 38 pasagjerë u fundos, duke shkaktuar vdekjen e tre personave, ndërsa tre të tjerë janë ende të zhdukur pas një aksidenti tjetër në Neufchatel-Hardelot, ku një anije me 115 pasagjerë u përfshi në një ngjarje të ngjashme.
Gjithashtu, një grua vdiq pas një përpjekjeje shpëtimi në anën britanike të kanalit, pasi u transportua me helikopter në Dover, por nuk mundi të shpëtohej.
Autoritetet franceze konfirmuan se dy nga viktimat ishin nga Vietnami dhe një nga Egjipti. Prefekti i Pas-de-Kalais, Laurent Touvet, e cilësoi natën si “të vështirë dhe tragjike” dhe shtoi se “rrjetet e trafikantëve mbajnë përgjegjësinë për këto tragjedi”.
Këto tragjedi kanë nxitur kritika ndaj politikave të azilit të Mbretërisë së Bashkuar dhe Francës. Organizatat joqeveritare fajësojnë rritjen e patrullimeve dhe kufizimin e rrugëve të sigurta ligjore për rritjen e numrit të viktimave. Enver Solomon, drejtor i Këshillit të Refugjatëve, theksoi se “njerëzit rrezikojnë kalimin e kanalit vetëm kur ajo nga e cila po ikin është më e frikshme se rreziqet përpara”.
Një zëdhënës i qeverisë britanike tha: “Jemi të vetëdijshëm për raportet e një incidenti në kanalin në ujërat territoriale franceze. Autoritetet franceze po udhëheqin hetimin. Nuk do të komentojmë më tej në këtë faze”.
Sipas Organizatës Ndërkombëtare të Migracionit, 85 persona humbën jetën duke u përpjekur të kalonin Kanalin në vitin 2024, dhe nga fillimi i vitit 2025 deri më 15 gusht, janë regjistruar 24 vdekje të tjera.
