90 miliardë euro kredi Ukrainës, Bashkimi Europian nuk dakordësohet për të prekur asetet e ngrira të Rusisë
Bashkimi Evropian do ti japë Ukrainës një kredi pa interes në vlerë prej 90 miliardë eurosh për të ndihmuar financimin e vendit të shkatërruar nga lufta.
Por pas bisedimeve që zgjatën deri në orët e para të mëngjesit të kësaj të premte, Unioni dështoi të miratonte propozimin për përdorimin e aseteve të ngrira ruse për të mbështetur nevojat ekonomike dhe ushtarake të Kievit në vitet në vijim.
“Ne u zotuam dhe i përmbushëm premtimet. Udhëheqësit e BE-së kanë miratuar një vendim për t’i dhënë Ukrainës një kredi prej 90 miliardë eurosh për dy vitet e ardhshme, të mbështetur nga buxheti i BE-së, të cilën Kievi do ta shlyejë vetëm pasi Rusia të paguajë dëmshpërblimet”, tha Antonio Costa, President i Këshillit Europian.
Financimi për Ukrainën është shndërruar në një çështje madhore për bllokun, teksa Shtetet e Bashkuara kanë kufizuar mbështetjen e tyre financiare dhe shtete si Hungaria po shtyjnë përpara idenë e reduktimit të financimit.
Në ditët e fundit, Putin tentoi të fajësonte Evropën dhe Ukrainën për dështimin e çdo përpjekjeje për paqe, duke u shprehur se Rusia do të marrë me forcë më shumë territor, nëse Kievi dhe udhëheqësit evropianë, që ai i quajti derrkucë nuk ndjekin qasjen e duhur ndaj propozimeve amerikane.
Aktualisht, Moska kontrollon gati një të pestën e territorit të Ukrainës, dhe zyrtarët rusë vazhdimisht kanë deklaruar se nuk do të bëjnë kompromis lidhur me pesë rajonet ukrainase që Putin, pretendon se janë ruse.
