Kryetarja e LSI-së Monika Kryemadhi falenderoi të gjithë donatorët që kontribuan në Shqipëri për fazën e rindërtimit pas tërmetit.
Përmes një deklarate për mediat, Kryemadhi u shpreh se Konferencë e të hënës dëshmoi se ndërkombëtarët nuk kanë asnjë paragjykim për shqiptarët, por detyrim për t’iu ardhur në ndihmë.
Ajo kërkon përgjegjshëmëri nga ana e qeverisë për rindërtimin e banesave dhe institucion monitorimi me ekspertë.
“Ky falenderim është më shumë se falenderim, por shpresë që do t’ju japë shqiptarëve forcën dhe kurajën për të vazhduar betejën e tyre dhe për t’iu treguar që nuk janë vetëm, por mbështeten nga BE. Takimi i djeshëm tregoi qartë që nuk ka asnjë lloj paragjykimi ndaj shqiptarëve, por ndjejnë detyrim për t’i ndihmuar. Notat e entuziazmit, mbaruan, por duhet të fillojë përgjegjësia dhe përgjegjshmëria e qeverisë. Për 256 mln euro për rindërtimin e shtëpive, që të mos paguajnë më kreditë e kripura, të ndërtohen sa më shpejt, jo t’i kap dimri i vitit tjetër. Takimi i djeshëm ua dha këtë shans. Buzëqeshja ishte shumë e madhe se prej vitesh po kërkon kredi, për të paguar administratë. 885 mln euro kredi, që do i paguajnë taksat e shqiptarëve. Është shumë e rëndësishme për të pasur një institucion monitorimi, me ekspertë për të bërë monitorimin e këtij projekti, se besimi i shqiptarëve ka humbur.”
Ndër të tjera, Kryemadhi nuk la pa kritikuar edhe qeverinë, për të cilën u shpreh se është e paaftë dhe ka humbur besimin e qytetarëve .
“Qeveria e ka treguar që është e paaftë për vende të reja pune, e paaftë për t’iu shërbyer shqiptarëve. Ne do të jemi të gatshëm dhe vigjilent për çdo projekt. Presim me padurim që të shohin ndërtesa e para, që të strehohen dhe fëmijët të shkojnë në shkollë si të gjithë të tjerët”, shtoi Monika Kryemadhi.
1 miliardë e 15 milionë euro është shuma e mbledhur në Konferencën e Donatorëve në ndihmë të rindërtimit të Shqipërisë pas dëmeve të shkaktuara nga tërmeti i 26 nëntorit. Ndihma e ofruar nga 48 shtete dhe organizma ndërkombëtarë financiar është e ndarë në grante dhe hua e asistencë teknike.
