Ish-ministri i LSI, Edmond Panariti komentoi në “Facebook” deklaratat e Greqisë se do të zgjerojë kufirin detar.
Ai u shpreh se në fakt problemi i Shqipërisë është se nuk po rri me këmbë në tokë sepse po i ikin të gjitha pasuritë.
Për Panaritin, janë disa pika të tjera të tilla si largimi i të rinjve dhe borxhi gjigand ato që po fundosin Shqipërinë.
“Halli i madh dhe i vërtetë sot i Shqipërisë nuk është deti, por toka! Çështja jonë më e mprehtë kombëtare është si ti mbajnë këmbët në tokë, sepse ajo po na rrëshqet poshtë tyre për ditë dhe më shumë. Po na rrëshqasin dhe firojnë pasuritë e Shqipërisë mbi tokë dhe nëntokë që shfrytëzohen por që nuk i sjellin asnjë qindarkë fitim dhe mirëqenie popullit të saj. Ato janë dorëzimi i vërtetë i sovranitetit! Çështja jonë e madhe dhe e dhimbshme është shkëputja e Rinisë nga trojet dhe vëndlindja e saj nga pamundësia e jetesës. Kjo hemorragji dhe ky shkretim është dorëzim i vërtetë i sovranitetit. Borxhi gjigand dhe asfiksues sa i gjithë prodhimi kombëtar është de fakto “pushtim” dhe dorëzim sovraniteti.”
Presidenti Ilir Meta premtoi këtë të enjte nga Vlora se për këtë çështje do të mbrojë Kushtetutën.
