Ish-deputetja e Partisë Demokratike, Albana Vokshi pyeti autoritetet shëndetësore se pse nuk po testohen për koronavirus mësuesit e infektuar. Përmes një postimi në “Facebook”, Vokshi tha se nga ana tjetër, për prokurorët e SPAK nuk ka asnjë hezitim për t’iu bërë tamponin.
“Pse tek SPAK bëhet tamponi dhe në shkolla ku ka mësues me COVID-9 jo? Në Durrës, në shumë shkolla, denoncohen raste mësuesish me COVID19 dhe mos marrja e masave të nevojshme në respektim të protokollit. Asnjë transparence, asnjë njoftim stafit mësimor apo prindërve. Durrësi po rrezikon të kthehet në vatër shpërthimi të virusit COVID19. Në disa shkolla rezultojnë drejtues dhe mësues me COVID: mësues në gjimnazin “Gjergj Kastrioti”, dy drejtues në shkollën 9-vjeçare “Qemal Mici”, mësues në gjimnazin “Naim Frashëri”, mësues në shkollën 9-vjeçare “Kushtrimi i Lirisë”, nëndrejtor në Gjimnazin “Leonik Tomeo”, etj.. Ndërkohë asnjë masë e marrë për tamponin e stafit mësimor, stafit ndihmës apo nxënësve që kanë pasur kontakt apo mësim me mësuesit me COVID19. A thua jeta e prokurorëve vlen më shumë se ajo e nxënësve e mësuesve??”
Albana Vokshi kërkoi testimin masiv për çdo mësues. Sipas saj, kjo është jetike dhe emergjencë.
