Australia do të ndalojë fëmijët nën 16 vjeç të përdorin rrjetet sociale, pas miratimit nga Senati i saj. Ky ndalim që nuk do të hyjë në fuqi për të paktën 12 muaj – parashikon gjoba deri në 50 milionë dollarë australianë (32.5 milionë dollarë amerikanë; 25.7 milionë paund) për kompanitë teknologjike që nuk e respektojnë.
Kryeministri Anthony Albanese thotë se legjislacioni është i nevojshëm për të mbrojtur të rinjtë nga “dëmet” e rrjeteve sociale, një qëndrim që është mbështetur edhe nga shumë grupe prindërish.
Megjithatë, kritikët theksojnë se mbeten pa përgjigje pyetje mbi mënyrën se si do të zbatohet ndalimi dhe ndikimin e tij mbi privatësinë dhe lidhjet sociale.
Kjo nuk është përpjekja e parë globale për të kufizuar përdorimin e rrjeteve sociale nga fëmijët, por Australia ka vendosur kufirin më të lartë të moshës nga çdo vend tjetër dhe nuk përfshin përjashtime për përdoruesit ekzistues apo ata me pëlqimin e prindërve.
“Kjo është një problem global dhe duam që të rinjtë australianë të kenë një fëmijëri,” tha Albanese gjatë prezantimit të projektligjit në Dhomën e Ulët javën e kaluar. “Duam që prindërit të kenë qetësi shpirtërore.”
Pas miratimit në Senat me 34 vota pro dhe 19 kundër, projektligji do të kthehet në Dhomën e Përfaqësuesve, ku qeveria ka shumicën, për të miratuar ndryshimet përpara se të bëhet ligj.
Ligji nuk specifikon se cilat platforma do të ndalohen. Këto vendime do të merren më vonë nga ministri australian i Komunikimit, në konsultim me Komisionerin për Sigurinë në Internet, i cili do të zbatojë rregullat.
Platformat e lojërave dhe mesazheve janë të përjashtuara, po ashtu edhe faqet që mund të aksesohen pa llogari, si YouTube.
Qeveria do të përdorë një formë teknologjie për verifikimin e moshës për të zbatuar kufizimet dhe do të testojë opsione të ndryshme muajt e ardhshëm. Përgjegjësia do të jetë mbi platformat e rrjeteve sociale për të zbatuar këto procese.
Megjithatë, studiuesit dixhitalë paralajmërojnë se nuk ka garanci që teknologjia e propozuar – e cila mund të bazohet në biometrikë ose informacion identiteti – do të funksionojë. Kritikët gjithashtu kërkojnë siguri që privatësia do të mbrohet.
Ligji i Australisë po ndiqet me interes të madh nga liderët globalë, ndërsa vende si Norvegjia dhe Mbretëria e Bashkuar po konsiderojnë masa të ngjashme.
