Kryebashkiaku i tiranës Erion Veliaj në një takim me nxënësit ekselentë të gjimnazit “Ismail Qemali” ku u diskutua mbi projektet e qytetit, tha se shumë shpejt do të nisë puna për ndërtimin e dy shkollave të reja.
“Një do jetë në zonën e Kryegjyshatës Botërore të Bektashinjve, që dikur njihej si Poligrafiku, mes shkollës “Abdulla Keta” dhe “Ismail Qemali”, sepse ajo është një lagje e stër-rritur, por do të ketë edhe një tjetër te zona që quhet Spitali i Arabëve, në Sauk. Shkollat “Kosova”, “Osman Myderizi”, “Mihal Grameno” dhe “Bashkim Fino” i çojnë të gjithë nxënësit tek “Ismail Qemali”, ndaj duam ta zgjidhim përfundimisht çështjen e këtyre dy lagjeve për gjimnaze. Kemi zgjedhur edhe terrenet, ndaj është çështje kohe sa të fillojmë investimet”, tha Veliaj.
Kreu i Bashkisë tha se vitin tjetër do të jetë hera e parë që Tirana do mbajë titullin “Kryeqyteti Mesdhetar i Kulturës dhe Dialogut” dhe prandaj qyteti duhet promovuar sa më shumë.
“Duam të vazhdojmë të provojmë se turistët nuk vijnë vetëm për të bërë një foto te sheshi Skënderbej. Në qoftë se s’kanë aktivitete ku të shkojnë dhe në qoftë se nuk kanë pika ku të fokusohen, atëherë bëhet e pamundur që eksperienca në Shqipëri t’ia vlejë të komentohet dhe t’ia vlejë për t’u ndarë me të tjerët. Mezi pres që në vitin tjetër, kush do vazhdojë për dramë, për teatër, për pikturë, për skulpturë, për regji, të vijë me projekte dhe ne do kemi një buxhet më të madh, pikërisht për të provuar se nuk janë lekë të harxhuara, janë lekë të investuara. Ato prodhojnë prapë ekonomi”, tha Veliaj.
Veliaj iu përgjigj edhe pyetjeve që kishin nxënësit lidhur me projektet e ardhshme të Bashkisë së Tiranës, apo për përfundimin e atyre ekzistuese./vizionplus.tv
