Dy ditë para protestës së opozitës kundër Kryeministrit Edi Rama, kryetari i PD Sali Berisha takoi demokratët e njësisë numër 5 në Tiranë për t’i ftuar të punojnë për organizimin e tubimit të së premtes.
Berisha u shpjegoi demokratëve se protestat e tyre për 6 muaj me radhë kanë treguar se vendi ka një opozitë e cila ka vendosur të reagojë kundër qeverisë.
“Jemi në prag të një proteste jashtëzakonisht të rëndësishme. Jemi të lodhur, po, pa diskutim. Jemi të rraskapitur, po, nuk them se jo. Shtrojmë pyetjen: këto protesta çfarë po sjellin? Ah, këtu qëndrojmë. Këto protesta u bënë zëri i Shqipërisë në mbarë kombin dhe në mbarë botën. Në qoftë se ne nuk do kishim qëndruar, sot nuk do ishim opozitë”, tha Berisha.
Berisha deklaroi para demokratëve se opozita do të vazhdojë betejën e saj deri në rrëzimin e qeverisë së drejtuar nga kryeministri Edi Rama.
“Ne do vazhdojmë protesta, protesta, protesta. Ju garantoj që ato janë jetike për shpëtimin e Shqipërisë”, u shpreh ai.
Në krah të kryetarit të Partisë Demokratike në takimin në njësinë 5, dhe në takimin e një dite më parë në zonën e Astirit, ishte edhe Ilir Alimehmeti i cili e ka deklaruar publikisht ambicien për të qenë kandidat i Partisë Demokratike në zgjedhjet që do të mbahen vitin e ardhshëm.
Partia Demokratike zyrtarisht nuk e ka shpallur kandidatin për Bashkinë e Tiranës, por Ilir Alimehmeti është i vetmi politikan që po shoqëron Sali Berishën në takimet e tij me demokratët e kryeqytetit.
/vizionplus.tv
