Nënkryetari i LSI, Petrit Vasili ka deklaruar se shqiptarët nuk kanë pse të shqetësohen për koronavirusin pasi virusi ka një prevalencë shumë të ulët në Ballkan. Vasili tha në “Facebook” se nuk ka arsye për panik dhe konfuzion, por mjafton të merren masat parandaluese.
“Situata lidhur me koronavirusin vazhdon të tregojë një prevalencë shumë të ulët në Ballkan. Shqipëria, Bosnje-Hercegovina, Mali i Zi, Bullgaria, Turqia dhe Serbia nuk kanë asnjë rast me koronavirus. I gjithë Ballkani ka deri më tani një numër shumë të ulët dhe vetëm 24 raste. Vigjilenca sanitare dhe masat maksimale parandaluese duhet të vazhdojnë pa asnjë tolerim. Arsye për panik dhe konfuzion nuk ka.”
Deri tani në Shqipëri nuk ka asnjë të konfirmuar me koronavirus, ndërsa janë dyfishuar masat në pikat e kontrollit. Të mërkurën u dyshua një rast në Korçë, ku ndërroi jetën një grua, e cila vuante nga diabeti dhe kishte probleme me frymëmarrjen. Por pas analizave rezultoi se ajo kishte vdekur për shkak të gripit.
