“India dhe SHBA duhet të punojnë së bashku me sukses për një Shekull të 21-të “të begatë dhe paqësor”, kështu u shpreh zëvendëspresidenti i SHBA-së, JD Vance në një fjalim duke bërë thirrje për lidhje më të ngushta midis vendeve në të gjithë sektorët.
Vance, i cili është në një vizitë katër-ditore në Indi, po fliste në një program në qytetin perëndimor të Jaipur.
“Por unë gjithashtu besoj se nëse dështojmë të punojmë së bashku me sukses, shekulli 21 mund të jetë një kohë shumë e errët për të gjithë njerëzimin,” shtoi ai.
Vërejtjet e zëvendëspresidentit erdhën një ditë pasi ai u takua me kryeministrin indian Narendra Modi dhe të dy vendet thanë se kishin bërë përparim në negocimin e një marrëveshjeje tregtare dypalëshe, nga e cila Delhi shpreson se do ta ndihmojë atë të shmangë tarifat më të larta.
India pjesë e një numri tw madh vendesh, që nxitojnë të negociojnë marrëveshje tregtare me SHBA-në gjatë pauzës 90-ditore të Presidentit Donald Trump për tarifat më të larta, e cila përfundon më 9 korrik.
India ishte vendosur të përballej me tarifa prej 27% të SHBA përpara se të shpallej pauza. Që atëherë, Delhi dhe Uashingtoni kanë punuar drejt një përfundimi të hershëm të negociatave tregtare.
Në fjalimin e tij në Jaipur, Vance tha se të dy vendet kishin finalizuar termat e referencës për negociatat.
“Ky është një hap jetik drejt realizimit të vizionit të Presidentit Trump dhe Kryeministrit Modi, sepse ai vendos një udhërrëfyes drejt një marrëveshjeje përfundimtare midis kombeve tona,” tha Vance.
Ai gjithashtu e quajti Modin një “negociator të ashpër” dhe dikë “që drejton një pazar të vështirë”, duke tërhequr duartrokitje nga audienca.
Modi dhe Trump ndajnë një marrëdhënie të ngrohtë personale: kryeministri indian ishte ndër liderët e parë globalë që vizitoi Trump pas fillimit të mandatit të tij të dytë. Por presidenti i SHBA-së ka vënë vazhdimisht në shënjestër tarifat e larta të Indisë, duke e quajtur atë një “mbret tarifash” dhe një “abuzues të madh” të lidhjeve tregtare.
Edhe në deklaratën e lëshuar të hënën pas takimit të Vance me Modi, Përfaqësuesi Tregtar i SHBA-së Jamieson Greer theksoi mungesën serioze të reciprocitetit në marrëdhëniet tregtare me Indinë.
India ka ulur tashmë tarifat për një numër mallrash në muajt e fundit dhe thuhet se po konsideron shkurtime më të gjera për të qetësuar Trump. Por sektorë si bujqësia, ku Uashingtoni dëshiron një akses më të madh, por India mbron ashpër janë ende pika ngecëse.
