Presidenti i SHBA-së, Donald Trump tha se Kievi, jo Moska, po e mban peng një marrëveshje të mundshme paqeje midis Rusisë dhe Ukrainës.
Në një intervistë me Reuters, Trump tha se presidenti rus Vladimir Putin është gati t’i japë fund pushtimit pothuajse katërvjeçar të Ukrainës dhe se udhëheqësi ukrainas Volodymyr Zelensky është më i rezervuar.
“Mendoj se (Putini) është gati të bëjë një marrëveshje. Mendoj se Ukraina është më pak e gatshme të bëjë një marrëveshje”, tha Trump.
I pyetur pse negociatat e ndërmjetësuara nga SHBA-të nuk kanë çuar ende në përfundimin e konfliktit më të madh tokësor në Evropë që nga Lufta e Dytë Botërore, Trump u përgjigj me një fjalë: “Zelensky”.
Komentet e Trump tregojnë se ai është përsëri i pakënaqur me sjelljen e Zelensky-t, me të cilin ka pasur prej kohësh një marrëdhënie të paqëndrueshme, megjithëse ndërveprimet e tyre duket se janë përmirësuar gjatë vitit 2025.
Zelensky ka përjashtuar publikisht çdo lëshim territorial ndaj Rusisë, duke thënë se Kievi nuk ka të drejtë sipas Kushtetutës të heqë dorë nga asnjë pjesë e territorit ukrainas.
