Zemërimi i amerikanëve kundër dhunës së ushtruar nga policia ndaj njerëzve me ngjyrë ka shkaktuar trazira në shtetin e Wisconsin.
Një 17 vjecar është arrestuar pasi ka vrarë dy persona dhe ka lënë të plagosur një tjetër gjatë protestave të dhunshme që vazhduan për tre netë me radhë. Këto zhvillime vijnë pasi afro-amerikani Jacob Blake u qëllua me 7 plumba në shpinë nga forcat e policisë të dielën dhe mbeti i paralizuar.
Presidenti Donald Trump ka shtuar praninë e forcave federale në qytetin Kenosha pasi protestat u shoqëruan me akte vandalizmi dhe vënien e zjarreve në objekte e biznese.
Jacob Blake u qëllua nga policia kur po futej në makinën ku ndodheshin edhe tre fëmijët e tij të mitur. Policët e përfshirë në incident janë pezulluar nga detyra.
Guvernatori i Wisconsinit, Ton Evers, ka autorizuar 500 trupa të Gardës Kombëtare për të mbajtur situatën nën kontroll.
