Tragjedia e Genovas ka vënë me shpatulla pas murit jo vetëm kompaninë koncesionare ‘Autostrade per l’Italia’, por edhe vetë qeverinë italiane. Kryeministri Giuseppe Conte ka shpallur gjendjen e jashtëzakonshme e cila do të zgjasë për 12 muaj. Gjatë një konference për shtyp, ai tha se numri I viktimave mund të rritet, ndërsa tragjedinë e së martës, e konsideroi të papranueshme. Conte paralajmëroi se kompania do të përballet me një gjobë prej 150 milionë euro.
Giuseppe Conte: “Tragjedia e papranueshme, do t’i heqim koncesionin shoqërisë që administron mirëmbajtjen e autostradë. Ne do të fillojmë procedurën e revokimit të lejes pa pritur gjetjet në procedurën penale
Dy zëvendëskryeministrat Matteo Salvini e Luigi di Maio, akuzoi kompaninë “Autostrade per l’Italia” si përgjegjëse të tragjedisë. Ata kërkuan tërheqjen e koncesionit të dhënë kompanisë. Ndërsa ministri i Transportit, Danilo Toninelli, ka kërkuar dorëheqjen e menjëhershme të drejtuesve të koncesionarit.
“Drejtuesit e Autostrade per l’Italia duhet të japin dorëheqjen të parët. Ne kemi nisur procedurat për revokimin e koncesionit dhe gjobitjen deri në 150 milionë euro”
Por “Autostrade per l’Italia” në një reagim të kësaj të fundit për mediat sqaron se zv-kryeministrat mund ta vërtetojnë se gjithmonë i kanë përmbushur detyrimet e tyre për mirëmbajtjen e rrugës, fakte të cilat bazohen në aktivitetet e monitorimit dhe mirëmbajtjes të kryera në bazë të standardeve ndërkombëtare.
Në fund të deklaratës, ‘Autostrade per l’Italia’ ka deklaruar se po punon për të përcaktuar projektin për rindërtimit të urës, një projekt i cili sipas tyre mund të mbyllet për vetëm pesë muaj.
Shembja e urës Morandi pjesë e autostradës A10, që shkaktoi të paktën 39 viktima, nxori në pah rrezikun që paraqet infrastruktura e vjetër, në vendin fqinj, 50 vjet që nga koha e ndërtimit. Një gjë e tillë ishte paralajmëruar për vite me radhë nga inxhinierët, të cilët e kishin konsideruar urën Morandi një dështim të inxhinierisë.
Nga ana tjetër mediat italiane shkruajnë se rreth 60% e rrugëve të vendit paraqesin rrezik.
