Senati Akademik i Universitetit të Arteve ka mbështetur unanimisht kërkesat e studentëve.
Pas Universitetit të Tiranës, edhe ai i Arteve në mbledhjen e senatit akademik të zhvilluar këtë të enjte vendosi që të mbështesë si një hap të nevojshëm përgjysmimin e tarifave të shkollimit.
Në deklaratën zyrtare të publikuar në faqen zyrtare në internet, senati akademik njoftoi se merr përsipër përfshirjen në statut dhe rregulloret e brendshme të institucionit që do të garantojnë pjesëmarrjen e nevojshme të studentëve në veprimtaritë akademike dhe financiare.
Më poshtë deklarata e Universitetit të Arteve:
Senati Akademik i Universitetit të Arteve (UART), në mbledhjen e datës 13.12.2018 si dhe në zbatim të kompetencave të tij ligjore dhe në mbështetje të protestës së studentëve, në mbledhjen e tij vendosi unanimisht që të shprehet në këtë deklaratë:
- Të mbështesë kërkesat e formuluara nga studentët.
- Të mbështesë si të nevojshme përgjysmimin e tarifave të shkollimit dhe t’i kërkojë Bordit të Administrimit përllogaritjen e efektit financiar për UART.
- Senati Akademik i UART merr përsipër me përgjegjësi përfshirjen e të gjitha mekanizmave financiarë, materialë dhe proceduralë për të garantuar transparencë maksimale dhe realizimin e tyre brenda vitit akademik 2018-2019, të të gjitha hapave të duhura drejt një arsimimi artistik cilësor, etikës në krijimtari e kërkim shkencor, por dhe përfshirjes direkte të studentëve,.
- Senati Akademik i UART mer përsipër përfshirjen në statut dhe rregulloret e brendshme të institucionit, kodifikimin e rregullave të qarta që do të garantojnë pjesëmarrjen e nevojshme të studentëve në veprimtaritë akademike dhe financiare.
- Senati Akademik i UART mer përsipër të ngrejë një grup të përbashkët pune, pedagogë dhe studentë, për shqyrtimin e të gjitha problematikave të ngritura dhe çështjeve të tjera që lidhen me përmirësimin e veprimtarisë së UART.
- Kjo deklaratë, të publikohet në faqen zyrtare të UART.
