Vullnetarë të shëndetshëm, të rinj do të infektohen me koronavirus me qëllim, për të studiuar sesi reagon trupi i njeriut ndaj virusit dhe për të ndihmuar në zhvillimin e vaksinave të reja.
Studimi do të fillojë në javët e ardhshme në Britaninë e Madhe dhe do të rekrutojë 90 persona të moshës 18-30 vjeç.
Ata do të ekspozohen ndaj virusit në një mjedis të sigurt dhe të kontrolluar, ndërsa mjekët monitorojnë shëndetin e tyre.
Provat do të ndihmojnë shkencëtarët të përpunojnë sasinë më të vogël të koronavirusit të nevojshëm për të shkaktuar infeksion, dhe si reagon sistemi imunitar i trupit njerëzor ndaj tij.
Kjo do të ndihmojë mjekët të kuptojnë më mirë COVID-19, e cila më pas do të çojë në zhvillimin e vaksinave dhe trajtimeve.
Clive Dix, kryetar i përkohshëm i Taskforcës së Vaksinave, tha: “Ne kemi siguruar një numër vaksinash të sigurta dhe efektive për Mbretërinë e Bashkuar, por është thelbësore që të vazhdojmë të zhvillojmë vaksina dhe trajtime të reja për COVID-19. Ne presim që këto studime të ofrojnë njohuri unike se si funksionon virusi dhe të na ndihmojnë të kuptojmë se cilat vaksina premtuese ofrojnë shansin më të mirë për parandalimin e infeksionit.”
Këto prova, sipas ekspertëve, na tregojnë gjëra që janë pothuajse të pamundura të zbulohen në botën reale.
Sa virus duhet për të filluar një infeksion? Si e mbështet sistemi imunitar mbrojtjen e tij fillestare? Cilët njerëz do të shfaqin simptoma dhe cilët jo? Këto pyetje pritet të marrin përgjigje pas këtij studimi, i cili është i pari në të gjithë botën që ka marrë dritën jeshile për t’u kryer.
Vullnetarët do të kontrollohen se janë të shëndetshëm dhe nuk janë infektuar më parë nga virusi. Ata do ta ekspozojnë hundën drejt virusit dhe më pas do të kalojnë 14 ditë në karantinë në spital, ndërsa do të monitorohen nga afër nga një ekip mjekësor.
Gjetja se si rritet virusi në hundë dhe analizimi i fazave shumë të hershme të infeksionit tek njerëzit përpara se të shfaqen simptomat janë dy qëllime kryesore.
Vullnetarët do të kompensohen për kohën e tyre, në shumën prej rreth 4,500 £ gjatë një viti, i cili do të përfshijë teste vijuese.
Fillimisht, studimi do të përdorë virusin që ka qarkulluar në Mbretërinë e Bashkuar që nga fillimi i pandemisë në mars, i cili është me rrezik të ulët për të rriturit e shëndetshëm, për të infektuar qëllimisht vullnetarët.
Me kalimin e kohës, një numri të vogël vullnetarësh ka të ngjarë t’i jepet një vaksinë e aprovuar dhe më pas të ekspozohet ndaj varianteve të reja, duke ndihmuar shkencëtarët të kuptojnë sesa efektive është në të vërtetë vaksina.
