Pas një seancë stërvitore të zhvilluar në Varshavë, në kryeqytetin polak fill pas humbjes zhgënjyese që na nxori jashtë play off-it kualifikues në kupën e botës, kombëtarja shqiptare u spostua në Valencia tashmë për miqësoren ndaj Ukrainës.
Një duel që në fakt nuk vlen për asgjë në këtë moment, Silvinjo dhe lojtarët janë të detyruar ta luajnë këtë duel ndaj skuadrës që u mund nga Suedia në gjysmëfinalen tjetër të play off, në kulmin e një mërzitje me përmasa kombëtare.
Polonia për mënyrën sesi shkoi ndeshja, rastet e pashfrytëzuara dhe gjendjen e kundërshtarit, ishte një rast unikal për të provuar ëndrrën “Botëror”. Megjithëse Armand Duka, kreu i FSHF dhe vete trajneri Silvinjo u përpoqën të mbanin lart moralin e skuadrës, humbja në Varshavë është një kujtim që nuk mund të venitet lehtë.
Sidomos për lojtarë që e patën këtë një mundësi të fundit në karrierë për të shkuar në kupën e botës, në një kohë që kishin provuar me herët emocionet e kampionatit europian. Bëhet fjalë për lojtarë si Hysaj, Ajeti, Gjimshiti…e ndoshta edhe Strakosha apo Nedim Bajrami.
Ndërkohe një çështje më aktuale se kurrë tek kuqezinjtë është e ardhmja e trajnerit Silvinjo, kontrata e të cilit përfundonte menjëherë pas sfidave play off të muajit mars. Duket se me venitjen e ëndrrës botëror, janë venitur edhe mundësitë që Silvinjo dhe stafi i tij të rinegociojnë rinovimin e kontratës me FSHF. Megjithatë duke pasur parasysh që përpara është miqësorja me Ukrainën me 31 mars, edhe kjo çështje shtyhet për ditët në vijim.
Testi miqësor do të luhet ne Valencia, atje ku kuqezinjtë janë spostuar tashmë për tu stërvitur disa ditë para ndeshjes. FSHF njoftoi se nga ekipi janë larguar Arlind Ajeti i dëmtuar në shpatull dhe i zëvendësuar kundër Polonisë, dhe Ylber Ramadani i cili mori leje pasi pret të bëhet baba për herë të dytë.
Të gjithë presin një skuadër të ndryshuar sa i takon formacionit titullar ndaj Ukrainës, me minuta më tepër për emra si Muçi e Mehmeti, madje ky është argumenti kryesor për të cilin opinioni publik kryqëzon Silvinjon duke qenë se janë dy lojtarët shqiptarë më në formë të momentit.
Prania e tyre në fushë kundër Ukrainës nuk do ti vlejë shumë kombëtares në miqësore, por me siguri mund t’i hapë atyre rrugën e një rrugëtimi të ri me kuqezinjtë, sidomos nëse Silvinjo nuk do të jetë më në stol./vizionplus.tv
