“Kur padrejtësia bëhet ligj, rezistenca bëhet detyrim”/ ‘Fanatics’ braktisin Tirana-Laçi pas 5 minutash lojë
Një gjest proteste është regjistruar në ndeshjen mes Tiranës dhe Laçit, e vlefshme për Kategorinë Superiore, ku tifogrupi “Fanatics” është larguar nga stadiumi pas vetëm pesë minutash lojë.
Sipas mesazhit të përcjellë nga tifogrupi, largimi është bërë në shenjë mbështetjeje për protestën e studentëve.
“Fanatics” kanë zgjedhur të shprehin qëndrimin e tyre përmes një mesazhi të drejtpërdrejtë: “Kur padrejtësia bëhet ligj, rezistenca bëhet detyrim.”
Në reagimin e tyre, tifozët u kanë bërë thirrje edhe grupeve të tjera të tifozëve që të bashkohen me studentët, duke e shtrirë kështu mesazhin e protestës përtej tribunave të stadiumit.
Ky veprim vjen në një kohë kur protesta e studentëve ka tërhequr vëmendje edhe jashtë ambienteve universitare, ndërsa qëndrimi i “Fanatics” e lidh atmosferën sportive me zhvillimet e fundit shoqërore.
