SHBA akuzon Kinën për test bërthamor të fshehtë
Shtetet e Bashkuara kanë akuzuar Kinën se ka kryer fshehurazi një test bërthamor në vitin 2020, duke shkelur angazhimet ndërkombëtare për ndalimin e testeve bërthamore. Paralelisht, Uashingtoni ka bërë thirrje për një traktat të ri dhe më gjithëpërfshirës për kontrollin e armëve, që do të përfshinte Kinën dhe Rusin.
Akuzat u bënë gjatë një konference globale për çarmatimin, duke nxjerrë në pah tensionet në rritje mes SHBA-së dhe Kinës, në një moment delikat për kontrollin e armëve bërthamore. Deklaratat vijnë vetëm një ditë pas skadimit të traktatit që kufizonte numrin e raketave dhe kokave bërthamore mes SHBA-së dhe Rusisë.
Zëvendëssekretari amerikan i Shtetit për Kontrollin e Armëve dhe Sigurinë Ndërkombëtare, Thomas Di Nanno, deklaroi në Konferencën për Çarmatimin në Gjenevë se qeveria amerikane ka informacion se Kina ka kryer teste bërthamore shpërthyese, përfshirë përgatitje për teste me fuqi të matur në qindra tonë.
Sipas tij, ushtria kineze ka tentuar t’i fshehë këto aktivitete, duke qenë e vetëdijshme se ato përbëjnë shkelje të angazhimeve ndërkombëtare. Ai shtoi se Kina ka përdorur metodën e njohur si “decoupling”, një teknikë që synon të reduktojë gjurmët sizmike të shpërthimeve, për të shmangur zbulimin nga sistemet ndërkombëtare të monitorimit.
SHBA-ja ka theksuar se zhvillime të tilla rrisin rrezikun global dhe nënvizojnë nevojën për një arkitekturë të re të kontrollit të armëve bërthamore, të përshtatur me realitetet aktuale gjeopolitike.
