Situata jo e mirë e financiare publike gjatë këtij viti është parë me shqetësim edhe nga guvernatori i Bankës së Shqipërisë.
Genti Sejko tha se ecuria jo pozitive të ardhurave buxhetore po bën presion mbi deficitin, ndaj ai i tërhoqi vëmendjen qeverisë për përmirësim të kësaj situate
Politika fiskale vijon të ruajë kahun e saj konsolidues, por intensiteti i konsolidimit fiskal është ulur. Ky zhvillim pasqyron rritjen më të shpejtë të shpenzimeve në raport me të ardhurat publike, ndonëse deficiti buxhetor vijon të mbetet në nivele të ulëta. Banka e Shqipërisë vijon të theksojë rëndësinë e forcimit të shëndetit të financave publike, nëpërmjet ruajtjes së fokusit në kontrollin e deficitit buxhetor dhe nëpërmjet reformave të mëtejshme për përmirësimin e administrimit të financave publike.
Gjatë konferencës së përmuajshme të Bankës së Shqipërisë, Sejko u ndal edhe të tkurrja e ekonomisë gjatë këtij viti.
Sipas të dhënave të INSTAT-it, ekonomia shqiptare u rrit me 2.3% në tremujorin e dytë të vitit. Rritja ekonomike është mbështetur nga zgjerimi i konsumit publik dhe privat, ndërkohë që eksportet neto dhe investimet kanë shënuar rënie. Ashtu si dhe në tremujorin e parë, ngadalësimi i ritmit të rritjes pasqyron rënien e prodhimit dhe të eksportit të energjisë elektrike, efektet tranzitore të mbylljes së lojërave të fatit, dhe hyrjen në fazën përfundimtare të punimeve në një projekt madhor energjetik.
Këshilli Mbikëqyrës mbajti të pandryshuar normën bazë të interesit në nivelin aktual prej 1 %.
