Rusia kreu një sërë sulmesh ajrore ndaj Ukrainës, duke lëshuar qindra dronë dhe dhjetëra raketa në disa rajone të vendit. Sipas presidentit ukrainas Volodymyr Zelensky, objektivi kryesor ishte kryeqyteti Kiev, ndërsa sulme pati edhe në zona të tjera.
Autoritetet ukrainase raportuan se të paktën katër persona humbën jetën në Kiev dhe rajonin përreth, ndërsa rreth 100 të tjerë mbetën të plagosur. Shpërthime të fuqishme u dëgjuan gjatë gjithë natës, ndërsa u dëmtuan dhjetëra ndërtesa banimi, një shkollë, një teatër dhe një muze.
Ministria ruse e Mbrojtjes deklaroi se gjatë sulmit u përdor raketa hipersonike Oreshnik, duke pretenduar se operacioni ishte përgjigje ndaj “sulmeve ukrainase mbi infrastrukturën civile”. Ushtria ukrainase mohon se ka shënjestruar civilë.
Sipas forcave ajrore ukrainase, nga ora 18:00 e së shtunës deri në mëngjesin e së dielës, u identifikuan 90 raketa dhe rreth 600 dronë rusë. Mbrojtja ajrore arriti të rrëzojë ose neutralizojë shumicën e tyre, megjithatë u regjistruan dhjetëra goditje direkte në disa zona.
Presidenti Zelensky deklaroi se një objekt i furnizimit me ujë u godit dhe se Muzeu i Çernobilit në Kiev është “praktikisht i shkatërruar”. Ministri i Brendshëm ukrainas, Ihor Klymenko, e cilësoi sulmin ndaj muzeut si “një sulm të qëllimshëm ndaj historisë, kujtesës dhe së vërtetës”.
Ndërkohë, sulme u raportuan edhe në rajonet ukrainase të Kharkiv, Odesa, Poltava, Sumy dhe Zhytomyr.
Nga ana tjetër, autoritetet ruse njoftuan se infrastruktura energjetike në rajonin kufitar të Belgorodit u dëmtua nga një sulm me raketa ukrainase, duke shkaktuar ndërprerje të energjisë elektrike dhe furnizimit me ujë, por pa viktima.
Liderë europianë, përfshirë presidentin francez Emmanuel Macron dhe kancelarin gjerman Friedrich Merz, dënuan sulmet ruse dhe përdorimin e mundshëm të raketës Oreshnik.
