Rrjeti i organizatave që merret me monitorimin e zgjedhjeve në Kosovë, Demokracia në Veprim (DnV) ka thënë të shtunën se respektimi i masave për luftim të pandemisë së koronavirusit pothuajse është braktisur gjatë fushatës së zhvilluar për zgjedhjet lokale të 17 tetorit.

Sipas këtij rrjeti, në mosrespektimin e masave kundër pandemisë, kanë pasur ndikim kontrollet dhe inspektimet e pamjaftueshme në institucionet përkatëse.

Në një konfenrecë për media, DnV, ka prezantuar një vlerësim rreth mbarëvajtjes së fushatës.

Demokracia në Veprim e ka cilësuar fushatën zgjedhore të qetë, derisa ka përmendur edhe se një pjesë e mirë e fushatës – edhe për shkak të pandemisë – është bartur në rrjetet sociale.

Ky rrjet e ka përmendur mungesën e transparencës në fondet e ndara për fushatë.

“Platformat ‘Facebook’ dhe ‘Instagram’ janë shfrytëzuar masivisht nga kandidatët për kryetarë të komunave dhe për ata për kuvendet komunale për plasim të informatave, shpalosje të ofertave programore, shpalosje të aktiviteteve e thirrjeve për votim. Ndonëse shumica dërrmuese e këtyre postimeve ishin të sponsorizuara, transparenca për koston financiare të fushatave dixhitale mungon”, është thënë në konferencë.

Komisioni Qendror i Zgjedhjeve në Kosovë (KQZ) ka nisur të shtunën që të shpërndajë materialin zgjedhor – përfshirë fletëvotimet – për zgjedhjet lokale që do të mbahen më 17 tetor.

Qytetarët e Kosovës do të zgjedhin kryetarët e rinj dhe asambletë komunale në 38 komuna.

Sipas KQZ-së, numri i qytetarëve me të drejtë vote është 1 milion e 885 mijë e 448 votues.

Në këto zgjedhje, qytetarët do të mund të votojnë për kryetarin e komunës dhe një asamblist./R.E.L

Leave a Reply

Your email address will not be published. Required fields are marked *