Një ditë pas përfundimit të finales së Conference League në Tiranë, kryeministri Edi Rama ka falënderuar të gjithë punonjësit dhe drejtuesit e shërbimeve publike që siguruan mbarëvajtjen e eventit sportit.
Sipas kryeministrit, angazhimi i tyre “zbardhi faqen e Shqipërisë” në sytë e evropianëve.
“RESPEKT! Një falenderim i megjithëzemërt, për të gjithë punonjësit e drejtuesit e shërbimeve publike të përfshira në eurosuksesin e djeshëm të Shqipërisë, nga Policia e Shtetit tek Aviacioni Civil, nga shërbimet portuale tek ato mjekësore, që siguruan mbarëvajtjen e eventit të madh sportiv të finales së Conference League, duke i zbardhur faqen Shqipërisë dhe bërë që të marrim përgëzimet më të ngrohta nga UEFA, nga ekipet drejtuese të të dyja skuadrave, si edhe nga miq e partnerë të vendit tonë”, shkruan Rama.
