Kryeministri i vendit, Edi Rama, gjatë takimit me kryebashkiakët e vendit ditën e sotme, njoftoi se brenda pak ditësh do të publikohen çmimet e reja të referencës për pasuritë e paluajtshme, të cilat do të përfshijnë për herë të parë edhe një diferencim të taksës mes shtëpisë së parë dhe të dytës.
Rama theksoi se taksa për shtëpitë e dyta, veçanërisht në zonat bregdetare, do të jetë më e lartë, duke krijuar një burim të rëndësishëm të ardhurash për bashkitë. Sipas tij, rritja e çmimeve të referencës do të ndikojë drejtpërdrejt në nivelin e taksës së pasurisë, ndaj është i domosdoshëm menaxhimi eficient i saj nga njësitë vendore. Ministria e Financave pritet të publikojë një udhëzues të posaçëm për zbatimin e kësaj reforme.
Rama: Punë ditësh, javësh do të dalin çmimet e reja të referencës. Çmimet e reja do të kenë dhe një element tjetër. Taksa për shtëpinë e dytë do të jetë më e madhe se sa për shtëpinë e parë. Bashkitë, sidomos ato të bregdetit do kenë një të ardhur domethënëse nga ky proces. Pasi shumë persona në bregdet kanë shtëpitë e dyta. Nga ana tjetër duke pasur parasysh që çmimet e referencës rriten në mënyrë të konsiderueshme dhe e bëjnë jo të vogël taksën e pasurisë, që do të thotë kush do ta menaxhojë mirën taksën e pasurisë do të ketë të ardhura të mira, një gjë duhet pasur parasysh.
Në disa bashki kemi taksa lokale eksesive, gjë që nuk bën sens. Ne e kemi bërë zero taksën e biznesit të vogël por në disa bashki taksa e tavolinës, ose taksa e tabelës…ka dhe raste ekstravagante të këtyre që merren me miniera iu vënë dhe taksa lokale të çuditshme, por edhe këtu duhet pasur parasysh që të ketë një lloj sensi dhe kuptimi e gjitha. Ministria e Financave do na japë një udhërëfyes për tu pasur parasysh në kushte kur me futjen e çmimeve të reja të referencës taksa e pronës do të rritet dhe me kushtet kur për herë të parë do fusim konceptin e shtëpisë së dytë. Të githë këta që kanë shtëpitë në bregdet do duhet të paguajnë më shumë.
Ministri i Financave Petrit Malaj tha se janë drejt finalizmit të çmimeve të reja të referencës.
Malaj: Ne jemi drejt finalizmit të çmimeve të reja të referencës. Vlera e pronave është rritur me 26%. Taksa e pronës është një nga taksat kryesore në të gjitha bashkitë e Evropës dhe duhet të ketë të njëjtën rëndësi edhe për bashkitë e vendit tonë. Paralelisht me taksën do të bëjmë edhe prezantimin e rivlerësimit të pronave që do të bëhet me në normë tatimore të reduktuar. Krahas vlerës së re të pronave, qytetarët do kenë mundëis të bëjnë dhe rivlerësimin e pronave./vizionplus.tv
