Pasi përfundoi paketa e parë e Rezistencës Sociale, përmes së cilës pensionistët dhe familjet në nevojë merrnin mbështetje 3 mijë lekë për të përballuar krizën e çmimeve, qeveria premton se do të ketë një paketë të dytë.
Ministrja Delina Ibrahimaj tha para gazetarëve se buxheti po rishikohet që të vijojë mbështetja financiare, por pa dhënë detaje për shumën dhe se kur do të nisë zbatimi.
DELINA IBRAHIMAJ
MINISTRE E FINANCAVE DHE E EKONOMISE
“Po rishikojmë buxhetin dhe po analizojmë konsumin, në përfundim të rishikimit do të dal me paketën që do të vijojë për bizneset dhe individët që kanë më shumë nevojë.”
Edhe Bordet e Transparencës, sipas ministres, kanë dhënë ndihmë në familjet shqiptare për të përballuar krizën, pavarësisht se shpesh ka pasur kritika për ndërhyrjen e tyre në një ekonomi të lirë tregu dhe për vendimet e tyre në dëm të konkurrencës.
DELINA IBRAHIMAJ
MINISTRE E FINANCAVE DHE EKONOMISE
“Bordet u ngritën për të shmangur spekulimet dhe abuzimet. Nuk ka asnjë të dhënë qe bordet kanë marrë vendime ndryshe nga ecuria e bursave. Duhet kujdes me referimet për bordin dhe bursën sepse në bursë ka shumë produkte dhe nënprodukte të karburanteve. Në asnjë rast vendimet e bordit nuk kanë qenë ndryshe nga bursa. Marzhet bruto të fitimit të kompanive që nga krijimi i bordit deri sot ka qenë 5-6%, ndërsa vjet kanë qenë 15-16%.”
Mbështetur edhe në të dhënat e INSTAT që flisnin për një rritje ekonomike 6% për tremujorin e parë të vitit, ministrja u shpreh optimiste që kjo rritje do të vijojë edhe përgjatë tremujorit të tretë, ndërsa në pjesën e fundit të vitit, do të ndihen efektet e krizës dhe ekonomia do të ngadalësohet.
