Kuvendi i Shqipërisë është rrethuar nga forca të shumta policie për të garantuar mbarëvajtjen e protestës së paralajmëruar nga opozita.
Protesta pritet të zhvillohet sot, paralelisht jashtë dhe brenda parlamentit, në një ditë kur deputetët do të votojnë dy raportet që lidhen me imunitetin e zëvendëskryeministres Belinda Balluku.
Sipas informacioneve nga policia, rreth 1500 efektivë janë vendosur në gatishmëri për të menaxhuar situatën dhe për të garantuar rendin dhe sigurinë gjatë zhvillimit të tubimit.
Policia e Shtetit bëri me dije një ditë më parë planin e masave për këtë protestë. Tubimi pritet të nisë në orën 10:00, ndërsa nga ora 06:00 deri në përfundim të protestës do të ketë kufizime në qarkullimin e automjeteve në rrugën “George W. Bush”, pranë parlamentit.
Autoritetet kanë paralajmëruar gjithashtu se, në varësi të zhvillimit të protestës, mund të vendosen kufizime të përkohshme edhe në akse të tjera rrugore. Trafiku do të devijohet në rrugë alternative për të lehtësuar lëvizjen e qytetarëve dhe për të shmangur bllokimet në zonën përreth parlamentit.
/vizionplus.tv
