Mjeku Ilir Alimehmeti, njëherësh anëtar i Këshillit Bashkiak të Tiranës, ishte i pranishëm në protestën e thirrur nga PD.
Gjatë fjalës së tij, ai bëri thirrje për rrëzimin e qeverisë, në mënyrë që në vend të rikthehen vlerat kombëtare.
“Nuk ka akuzë më të madhe për një qeveri sesa shpopullimi. Këtu ku jemi sot nuk kemi ardhur rastësisht. Unë kujtoj një vend ku kishim dy fjalë, nënë dhe baba; sot kemi prind 1 dhe prind 2 sipas kësaj qeverie. Kishim dy gjini, sot kemi shumë gjini. Sot kemi një vend me ish-pronarë. Kujtoj një vend me rrugë kombëtare të sigurta; sot qeveria ndërton rrugë që bien brenda vitit. Kujtoj një vend që u bë anëtar i NATO-s; sot kemi një qeveri që u shpërndan certifikata sigurie bandave. Ta kthejmë Shqipërinë te vlera e familjes, vlera e shoqërisë, vlera e të mirave evropiane. T’i kthejmë shqiptarët në vendin e tyre, por më parë duhet larguar Edi Rama dhe kjo qeveri”, tha Alimehmeti.
