Presidenti, Ilir Meta, mbremjën e kësaj të shtune ka qenë në Durrës, aty ku ishte dhe epiqendra e tërmetit 5.8 ballë që tronditi vendin.
Gjatë vizitës së tij në Durrës, Meta është takuar me prefektin Roland Nasto, për t’u njohur në detaje me pasojat që shkaktoi tërmeti.
Në një deklaratë të shkurtër për mediat, kreu i shtetit tha se duhet të ruajmë qetësinë, ndërsa theksoi se duhet të jemi të vëmendshëm, pasi jetojmë në një rajon problematik.
“U njoha nga Prefekti dhe nga Shtabi i emergjencave me punë që ata po bëjnë në terren dhe është e rëndësishme të merren masa për të verifikuar pasojat që mund të kemi edhe për të ardhmen, sidomos për banesat që mund të jenë dëmtuar dhe mund të jenë problematike për t’u banuar. Mendoj që jemi në kushtet e një vigjilence të vazhdueshme pasi jetojmë në një rajon problematik dhe është e rëndësishme të jemi në bashkëpunim të vazhdueshëm me vendet fqinje, në mënyrë që të jemi të përgatitur për ç’do situatë. Tani është koha për të qenë gjithmonë të vëmendshëm dhe është e rëndësishme të punohet me efikasitet nga të gjitha strukturat”.
