Ndërsa kanë mbetur vetëm 9 ditë nga takimi i shumëpritur Trump-Kim Jong Un, duket se SHBA nuk ka hequr dorë nga linja e ashpër e komunikimit diplomatik. Sekretari i mbrojtjes, James Mattis ka deklaruar në mënyrë të prerë se Koreja e Veriut nuk do te përfitojë asnjë lehtësim të sanksioneve derisa të ketë treguar hapa të verifikueshme dhe të pakthyeshme për denuklearizimin.
Ndërsa mori pjesë në një samit vjetor të sigurisë në Singapor, Mattis ka deklaruar se duhet mbajtur qëndrim vigjilent e gjithashtu duhet treguar një qasje e bashkëpunimit të forte në mënyrë që negociatat të sjellin rezultat. Samiti i 12 qershorit në Singapor ka tejkaluar deri më tani disa pengesa që shkuan deri në anulimin e tij nga presidenti Trump i cili nëpërmjet një letre argumentoi vendimin si një masë ndaj gjuhës retorike dhe aspak të matur të vendit komunist.
Të premten, në një kthesë të jashtëzakonshme Trump konfirmoi se takimi do të mbahet në datën dhe vendin e planifikuar, pavarësisht ngjarjeve të ditëve të kaluara. Ndërkohë bisedimet midis diplomatëve, kanë vijuar në mënyrë intensive.
Çështja e denuklearizimit, për një kohë të gjatë ka përplasur dy vendet dhe mbetet aspekti më i diskutueshëm e sfidues i çdo marrëveshjeje të mundshme. Regjimi i Koresë së Veriut ka treguar historikisht mungesën e vullnetit për të hequr dorë nga potencialet bërthamore, të cilat i sheh si një garanci për mbijetesë përballë kërcënimeve te Shteteve te Bashkuara.
