Kreu i Bindjes Demokratike ironizoi pas shpalljes së Joe Biden fitues të zgjedhjeve në SHBA. Pas rezultatit në rrjetet sociale qarkulloi një foto e kryedemokratit Lulzim Basha dhe ish-kryebashkiakut të Kamzës, Xhelal Mziu që e shpallin Donald Trump Qytetar Nderi. Sipas Patozit, nuk duhet të habitemi nëse të njëjtën gjë bën edhe Rama me Joe Biden.
“NUK DO TË ISHTE ÇUDI… Mos e tregoni kaq shumë atë foton e Lulit me Xhelal Mziun, tani që u shpall rezultati në Amerikë, se nuk është çudi që të shkojë nesër Edi Rama atje dhe bashkë me Rakip Sulin ta shpallin Joe Biden si Qytetar Nderi të Kamzës. Sepse tek kjo pikë nuk është se kanë ndonjë ndryshim të madh midis tyre.”
Sipas projeksioneve të mediave amerikane, Joe Biden ka grumbulluar 290 vota elektorale, duke siguruar kështu kryesimin e Shtëpisë së Bardhë.
