Një moment i pazakontë i kapur nga kamerat gjatë mbërritjes së Presidentit francez Emmanuel Macron dhe bashkëshortes së tij, Brigitte, në aeroportin e Hanoit, në kuadër të vizitës së tyre zyrtare në Azi, ka tërhequr vëmendjen e mediave dhe rrjeteve sociale.
Pamjet tregojnë një skenë të papritur kur, në çastin që hapet dera e aeroplanit, dora e Brigitte godet aksidentalisht fytyrën e presidentit Macron. Ky moment u pasua nga një tjetër detaj që ka ngjallur komente: refuzimi i Brigitte për t’i zgjatur dorën presidentit gjatë zbritjes nga shkallët e avionit.
Videoja u përhap me shpejtësi në rrjete sociale, duke nxitur spekulime dhe interpretime të ndryshme. Fillimisht, Pallati Elize mohoi vërtetësinë e pamjeve, por më pas ndryshoi qëndrim përballë jehonës mediatike.
Në një reagim zyrtar, një nga këshilltarët e afërt të presidentit e përshkroi ngjarjen si një “shkëmbim të zakonshëm mes bashkëshortësh”, duke e minimizuar peshën e incidentit. Më vonë, një tjetër deklaratë nga Elizeja e quajti skenën një “moment relaksimi dhe shfryrjeje” mes çiftit presidencial, përpara fillimit të agjendës zyrtare.
Zyrtarë të tjerë nga Elizeja shtuan se bëhej fjalë për një “grindje të shkurtër”, një situatë normale dhe e përditshme që mund të ndodhë në çdo marrëdhënie, veçanërisht në kushte tensioni dhe përgatitjesh për vizita zyrtare.
Pavarësisht interpretimit të ngjarjes, Pallati Elize ka bërë përpjekje të qarta për të minimizuar çdo spekulim mbi një përplasje serioze mes presidentit dhe zonjës së parë të Francës.
/vizionplus.tv
