11 muaj pas tërmetit tragjik të 26 Nëntorit parlamenti ka miratuar paketën ligjore që synon të rregullojë sektorin e ndërtimit.
Deputetët kanë votuar ndryshime në dy ligje; në ligjin “Për planifikimin dhe zhvillimin e territorit” dhe “Për kontrollin dhe disiplinimin e punimeve të ndërtimit”.
Së pari ky kuadër i ri ligjor synon të rregullojë përgjegjësinë e zhvilluesit duke futur detyrimin për sigurimin.
ETILDA GJONAJ
MINISTRE E DREJTESISE
“I cili do të konsiderohet si subjekt përgjegjës si në rastin e dorëzimit të kontratave të sigurimit që mbulojnë dëmet eventuale por edhe në rast se objekti ndërtohet në shkelje të kushteve të lejes duke marrë përsipër mbulimin e të gjitha kostove përkatëse që mund të nevojiten. Por njëkohësisht edhe në rastin e dorëzimit tek blerësi të polices së sigurimit me afat 10 vjeçar që mbulon dëmet e ndërtesës.”
MYLSYM MURRIZ
KRYETAR I GRUPIT PARLAMENTAR “DEMOKRAT”
“Kur s’të japin 20 mijë lekë të vjetra për një pasqyrë, ju mendoni se do japin lekë për shtëpi.”
Ligji synon t’i japë më shumë kompetenca Këshillit Kombëtar të Territorit.
“Pavarësisht natyrës së ndërhyrjeve të gjitha llojet e punimeve brenda zonës të brezit të zhvillimeve të kontrolluara apo zonave me përparësi të jenë objekt i një leje ndërtimi të miratuar nga Këshilli Kombëtar i Territorit për të pasur një kontroll tërësor dhe për të mos lejuar problematikat të cilat u shfaqën pas tërmetit të 26 Nëntorit.”
Nga ana tjetër ndryshimet në ligj kanë detajuar edhe detyrimet që kanë projektuesit, zbatuesit, mbikëqyrësit .
“Është parashikuar përfshirja e një liste të zezë ku të gjithë ata projektues të cilët nuk zbatojnë rregullat e lejes zhvillimore do të jenë pjesë e kësaj liste duke u konsideruar si të papërshtatshëm për të përfituar nga të gjitha licencat që jepen nga autoritetet e pushtetit vendor apo qendror.”
Përtej këtyre dy ligjeve parlamenti pritet të miratojë së shpejti edhe ndryshimet në Kodin Penal, i cili parashikon që ndërtimet e jashtëligjshme që rrezikojnë jetën e qytetarëve dënohen me burg deri në 15 vjet.
