Një grup kriminal që dyshohet se shpërndante lëndë narkotike në disa qytete të vendit, si dhe e trafikonte atë jashtë Shqipërisë është goditur nga Policia pas një hetimi disa javor.
Operacioni i koduar “Jug & Veri” nën drejtimin e Prokurorisë së Elbasanit u finalizua me vendosjen në pranga të 4 personave: Arben Guçe, Elion Qeva, Fran Pjetra të dyshuar për trafikim të lëndëve narkotike dhe armëve, ndërsa u ndalua edhe Mark Muraca banues në Shkodër, i cili dyshohet se kishte vënë në dispozicion automjetin e tij për transportimin e drogës.
Gjatë ndërhyrjes, njëri nga të arrestuarit Arben Guçe ka kundërshtuar punonjësit e Policisë dhe, gjatë tentativës për t’u larguar, ka dëmtuar mjetin e shërbimit të Policisë.
Nga kontrolli në makinën e tij u gjet një kallashnikov, së bashku me 32 fishekë luftarakë, që dyshohet se do të trafikohej.
Ndërsa në automjetin tip “Volkswagen Golf”, të Fran Pjetrit, u gjet 41 kg Cannabis, e cila po transportohej me qëllim trafikimin drejt Pikës së Kalimit Kufitar Qafë Thanë.
Të arrestuarit akuzohen për “Trafikimi i armëve dhe i municionit”, “Trafikimi i narkotikëve”, “Kundërshtimi i punonjësit të policisë së rendit publik”, “Shkatërrimi i pronës” dhe “Shkelja e rregullave të qarkullimit rrugor”.
