“Nuk meritojnë të jetojnë”, ministri izraelit kërkon vrasjen e 30-40 palestinezëve në Gaza çdo natë

Ministri izraelit i Sigurisë Kombëtare, Itamar Ben-Gvir, ka bërë thirrje që forcat izraelite të vrasin çdo natë 30–40 persona në Gaza.

Ben-Gvir i bëri deklaratat gjatë një podcasti me Rom Braslavskin, një ish-i burgosur izraelit i mbajtur në Gaza.

Episodi u publikua të dielën dhe deklaratat e ministrit u shpërndanë gjerësisht në mediat palestineze.

“Ka njerëz atje që nuk e meritojnë të jetojnë. Ata nuk duhet të jetojnë. Ata nuk janë as njerëz”, tha Ben-Gvir.

Deklaratat janë pjesë e një historie të gjatë qëndrimesh ekstremiste nga Ben-Gvir, i cili është pjesë e koalicionit qeverisës të kryeministrit Benjamin Netanyahu dhe ka në varësi policinë dhe shërbimet e burgjeve në Izrael.

Ndërsa Izraeli i afrohet zgjedhjeve të 27 tetorit, ministri i ekstremit të djathtë ka fituar më shumë ndikim politik.

Gjatë bisedës me Braslavskin, Ben-Gvir tha se nuk ishte dakord me vendimin e Netanyahut për të kufizuar sulmet ushtarake në Gaza.

Ai kërkoi rikthimin e vrasjeve të synuara, edhe ndaj personave që nuk përbëjnë kërcënim të drejtpërdrejtë në atë moment.

Ben-Gvir nuk ka autoritet formal mbi ushtrinë izraelite dhe nuk mund të urdhërojë vetë sulme ushtarake. Megjithatë, ai është anëtar i kabinetit të sigurisë, organit të lartë qeveritar që ndihmon në përcaktimin e politikës së Izraelit për luftën dhe sigurinë.