Procesi i votimit për zgjedhjet parlamentare në Gjermani ka përfunduar dhe ka nisur numërimi i votave. Rezultatet paraprake sipas exit polls prezantojnë një garë shumë të ngushtë mes konservatorëve dhe socialdemokratëve, të cilët parashikohet të kenë siguruar përkatësisht nga 25 % të votave. Në vend të tretë renditen “Të Gjelbrit” me 15 %.
Rreth 60,4 milionë qytetarë patën të drejtën e votës për të përcaktuar kandidatët e qarqeve për në parlament si dhe partitë.
Është pikërisht vota e dytë për partitë që përcakton se kush do të jetë kancelari I ri. Në bazë të rezultateve përcaktohet niveli i përfaqësimit politik në parlament dhe numri i mandateve për secilën parti.
Gjithsej janë 47 parti dhe grupime që konkurrojnë në zgjedhje, shifra më e lartë që pas ribashkimit të Gjermanisë. Pritshmëritë janë që vetëm 6 prej tyre të përfaqësohen në parlament.
Sipas sondazheve pritet që për herë të parë që nga viti 1957 të jetë i nevojshëm një koalicion qeverisës i përbërë nga tri parti, apsi asnjëra prej tyre me gjasë nuk mund të arrijë shumicën e nevojshme për të qeverisur vetëm ose në koalicion dysh.
Kësisoj marrëveshjet për koalicion duket se do të marrin kohë, duke zgjatur kështu edhe më shumë detyrën e kancelares Angela Merkel, e cila pas 16 vitesh në këtë post, nuk do të rikandidojë.
Në këto zgjedhje është rritur ndjeshëm votimi në distancë për shkak të pandemisë, rreth 40 përqind e votave janë dërguar me postë.