Viktimat nga koronavirusi po shtohen në mënyrë tragjike. Të hënën 103 persona vdiqën nga virusi vetëm në provincën Hubei, në Kinë, duke shënuar një rekord të ri ditor. Numri i viktimave në mbarë vendin ka shkuar në 1.016.
Por fatmirësisht numri i infeksioneve të reja në shkallë vendi ishte zvogëluar gati 20% krahasuar me një ditë më parë.
Sipas zyrtarëve, tani janë mbi 42 mije raste të infektuara me koronavirus në gjithë territorin e Kinës. Ndërkohë që jashtë Kinës virusi është përhapur në 24 vende dhe janë regjistruar 319 të infektuar.
Bashkimi Evropian paralajmëroi një takim të jashtëzakonshëm të ministrave të Shëndetësisë, i cili do të mbahet të enjten. Megjithëse mjeket italianë njoftuan se kishin arritur të izolonin përhapjen e epidemisë, vaksina për ta mposhtur atë është ende larg.
