Bisedimet mes Shteteve të Bashkuara të Amerikës dhe Iranit kanë hyrë në një fazë vendimtare gjatë orëve të fundit, me qëllim heqjen e pengesave të mbetura për arritjen e një marrëveshjeje.
Presidenti amerikan Donald Trump njoftoi papritur pezullimin e përkohshëm të operacionit “Operacionit Liria”, i cili synon garantimin e kalimit të sigurt të anijeve në Ngushticën e Hormuzit.
Në një deklaratë në rrjetet sociale, Trump theksoi se ky vendim u mor pas kërkesave nga vende si Pakistani. Ai sqaroi se bllokada detare do të mbetet në fuqi, por operacioni do të ndalet përkohësisht për të testuar mundësinë e finalizimit të marrëveshjes.
Megjithatë, pezullimi nuk nënkupton fundin e presionit ndaj Teheranit, pasi bllokada detare vazhdon. Nga ana tjetër, ky hap shihet si një sinjal vullneti të mirë nga SHBA, ndërsa Irani po intensifikon aktivitetin diplomatik. Ministri i Jashtëm iranian Abbas Araghchi ndodhet aktualisht në Pekin për takime me homologun e tij kinez, Wang Yi.
Nga ana tjetër, sekretari amerikan i shtetit Marco Rubio deklaroi se operacionet ushtarake kundër Iranit kanë përfunduar dhe fokusi tashmë është te zgjidhja diplomatike. Ndërkohë, ai zhvilloi edhe një bisedë me homologun rus Sergey Lavrov mbi zhvillimet ndërkombëtare.
Ndërkohë, Kina, si një nga blerësit kryesorë të naftës iraniane, po luan një rol të rëndësishëm në përpjekjet për zgjidhjen e konfliktit. Presidenti Trump pritet të vizitojë Pekinin javën e ardhshme, duke theksuar rëndësinë e rolit kinez në këtë proces.
Në aspektin ekonomik, rritja e çmimeve të naftës ka ndikuar negativisht në tregjet globale dhe në jetën e përditshme të qytetarëve. Megjithatë, Trump e cilësoi këtë si një “çmim të vogël” për të parandaluar zhvillimin e armëve bërthamore nga Irani.
Ndërkohë, Irani ka prezantuar një mekanizëm të ri për kontrollin e trafikut detar në Ngushticën e Hormuzit, duke kërkuar që anijet të ndjekin procedura të reja për të marrë leje kalimi. Ky sistem mund të çojë në vendosjen e tarifave të reja, duke i sjellë përfitime ekonomike Teheranit në periudhën pas konfliktit.
Të gjitha këto zhvillime tregojnë se një marrëveshje mund të jetë afër, megjithëse çështje kyçe si programi bërthamor iranian mbeten ende të pazgjidhura.
