Mbërrin anija me 49 emigrantë, nisin procedurat në Shëngjin, pritet vendosja e tyre në qendrat e Gjadrit
Anija e Marinës Ushtarake italiane “Cassiopea” me 49 emigrantë në bord, mbërriti mëngjesin e kësaj të marte në Shëngjin.
Anija ishte nisur të premten nga ishulli Lampedusa, por për shkak të një problemi, mbërritja e saj në Shëngjin vonoi dhe ajo preku ujërat shqiptare vetëm këtë të martë.
Emigrantët e ardhur janë me kombësi nga Egjipti, Bangladeshi, Bregu i Fildishtë dhe Gambia.
Fillimisht ata do t’i nënshtrohen procedurave të verifikimit dhe kontrollit shëndetësor në qendrën pritëse të Shëngjinit dhe më pas do të transferohen drejt Gjadrit.
Ky është kontingjenti i tretë i emigrantëve që mbërrijnë në Shqipëri nga ishulli i Lampeduzas në Itali.
Më 16 tetor dhe 8 nëntor të vitit që shkoi ishte anija “Libra” solli në Shqipëri dy kontingjente me 24 emigrantë, kryesisht nga Egjipti dhe Bangladeshi, të cilët, pas vendimit të gjykatës italiane, u rikthyen në Itali.
Por këtë herë nuk pritet të përsëritet i njëjti skenar, pasi Gjykata e Lartë në Romë legjitimoi marrëveshjen Rama-Meloni për emigrantët.
Qendra pritëse e emigrantëve në Gjadër të Lezhës nisi të funksionojë në shtatorin e vitit 2024.
Sipas marrëveshjes, territori i dy qendrave pritëse administrohet nga pala italiane e cila e ndërtoi atë, ndërsa autoritetet shqiptare janë në mbështetje të tyre.
/vizionplus.tv
