Ministri i Brendshëm, Sandër Lleshaj u thirr në një interpelancë nga deputeti i opozitës, Lefter Maliqi. Lleshaj sqaroi situatën e krimit të organizuar dhe të kanabisit në vend, por Maliqi nuk u duk i kënaqur. Ai i quajti shpjegimet e ministrit përralla dhe e akuzoi se po e lë veten të përdoret nga kryeministri Edi Rama.
“Këto ishin përralla zoti Lleshaj, bëre mirë që lexove se do ngatërroje shifra e data si ngatërrove datën e zgjedhje, aq më keq po të dëgjonte kryeministri se ca je me probleme se nuk drejton dot qarkun e Lezhës, në PS nuk je, të ka larguar edhe nga mbledhja Rama ty. Lëri këto përralla se e dinë shqiptarët që po pati vullnet politik për dy ditë vendoset rendi. Ju përdor kryeministri ju për qëllimet meskine dhe lidhjet me oligarkë e banda. Uroj të mos kesh fatin e Tahirit se ai ishte edhe socialist dhe e hodhën në rrugë, po bredh gjykatave tani. Çfarë the këtu, ishin flluskë sapuni.”
Sipas Lefter Maliqit, kriminaliteti është bërë njësh me politikën dhe drejtuesit e policisë.
Por ministri Sandër Lleshaj tha në fjalën e tij se gjatë qeverisjes së PS krimi i organizuar ka marrë goditje të fortë dhe vendi është ç’kanabizuar.
