Korçë, ARRSH masa për përballimin e situatës dimërore

Në prag të stinës së dimrit Autoriteti Rrugor Shqiptar ka kontraktuar 5 firma për mirëmbajtjen e akseve nacionale rrugore gjatë periudhës dimërore në qarkun e Korçës.

Janë rreth 340 km rrugë nga të cilat 80 km janë të mbuluara me kontratën e Bankës Botërore dhe pjesa tjetër me firmat private të kontraktuara për mirëmbajtjen dimërore.

Përgjegjësi i Sektorit të Mirëmbajtjes Olti Zhamo thotë se prej fillimit të nëntorit të gjitha firmat e kontraktuara kanë marrë masa dhe vendosur mjetet në gatishmëri pranë akseve rrugore ndërkohë që janë siguruar edhe sasitë e kripës dhe skorjeve:

Rreth 370 ton kripë janë tashmë pranë kampeve të ngritura nga firmat e kontraktuara për mirëmbajtjen dimërore, çka është gjysma e sasisë së planifikuar, ndërkohë që pjesa tjetër do të tërhiqet në vazhdim për të siguruar ndërhyrjen në çdo moment sipas situatës së rreshjeve të bores dhe ngricave gjatë dimrit.