Erida Skëndaj drejtuese e Komitetit të Helsinkit e ftuar në emisionin “Quo Vadis” në “Vizion Plus” nxori në pah mosimplementimin e disa rekomandimeve të OSBE-ODIHR në Kodin e ri Zgjedhor që u miratua këtë të hënë në Kuvend, ndonëse i gjithë diskursi politik bëhet duke marrë parasysh standardin e këtyre institucioneve.
“Në vlerësimin e Komitetit të Helsinkit nuk janë adresuar të gjitha rekomandimet kyç të OSBE-ODIHR. Në mënyrë të veçantë, do të veçoja rekomandimin më primar, që është KQZ. Procesi ka qenë tërësisht i mbyllur, jo gjithëpërfshirës ku aktorët e shoqërisë civile duhet të jepnin kontributin e tyre profesional.”
Ekspertët rendisin një sërë faktesh për t’iu përgjigjur pyetjes nëse ky kod i ri garanton apo jo një proces më demokratik?
“Në fund të ditës ne kemi thjesht një KQZ të rikonstruktuar që do të përbëhet nga 3 organe drejtuese, pra ka një ndryshim nga KQZ që lamë pas. Por nga mënyra sesi kjo KQZ zgjidhet, nuk ka ndryshime. Sërish do të jetë konsensusi politik që do të çojë personat në përbërje të kësaj KQZ dhe më pas krijohen edhe premisa për ndikime të natyrës politike. Kodi Zgjedhor nuk parashikon asnjë kriter që KQZ me procedurat dhe modalitetet e saj të caktojë si persona që do të kontrollojnë financat e partive politike.”
Drejtuesja e Komitetit të Helsinkit shtoi në fund se qytetarët janë ata që humbasin më shumë nga ndryshime të tillë në legjislacion, të pakonsultuara gjerësisht me ekspertët e që bëhen me shpejtësi pa marrë për bazë rekomandimet e ODIHR.
