Në Prokurorinë e Posaçme, sot në orën 10:00, zhvillohet ceremonia zyrtare e kalimit të detyrës nga Altin Dumani te kryetari i ri i SPAK, Klodian Braho, i cili u zgjodh me 7 vota nga anëtarët e KLP-së.
Ky moment vlerësohet nga SPAK si i rëndësishëm për garantimin e vazhdimësisë dhe forcimin e mëtejshëm të punës së Strukturës së Posaçme kundër Korrupsionit dhe Krimit të Organizuar.
Mandati i kreut të SPAK është 3-vjeçar, pa të drejtë rizgjedhjeje. Altin Dumani, i cili mori detyrën pas Arben Krajës, drejtuesit të parë të SPAK, do të vijojë punën si prokuror i kësaj strukture deri në vitin 2028, kur i përfundon mandati i tij 9-vjeçar.
Dumani e përmbyll mandatin si drejtues në një periudhë të shoqëruar me kërkesa të vazhdueshme për ndryshime ligjore, që do t’u jepnin mundësi prokurorëve të SPAK të rikandidojnë për drejtimin e institucionit.
Klodian Braho
Prokurori Klodian Braho u zgjodh kreu i ri i SPAK, duke marrë 7 vota pro nga 11 anëtarë që janë në total.
Braho ka qenë pjesë e sistemit të drejtësisë që prej vitit 2007, ka qenë ndërkohë një nga figurat kryesore të SPAK-ut.
Ai drejton ndërkohë Seksionin e Korrupsionit dhe është autor i hetimeve ndaj disa prej dosjeve më të rëndësishme të viteve të fundit.
Braho ka hetuar çështjen e inceneratorit të Elbasanit, për të cilën lëshoi urdhër-arreste për persona të përfshirë në skemën korruptive, si dhe ndau hetimin për ish-zv/kryeministrin Arben Ahmetaj.
Mes çështjeve të tjera të rëndësishme janë dosja “5D”, ku u dërguan në gjyq ish-zyrtarë të Bashkisë së Tiranës, si dhe “Toyota Auris”, një dosje që vijon të hetohet në disa pista. Ai është gjithashtu pjesë e grupit të prokurorëve që ngritën akuzën për ish-ministrin Fatmir Mediu në lidhje me tragjedinë e Gërdecit./vizionplus.tv
