Kandidati për kreun e Partisë Demokratike, Fatbardh Kadilli ka prezantuar këtë të martë platformën për drejtimin e PD.
Në një konferencë për mediat, Kadilli tha se programi i tij ka për qëllim që PD-në ta nxjerrë fituese.
Ai tha se 13 qershori do të jetë data e fitores brenda kampit opozitar.
Nëse ai merr drejtimin e PD-së, Kadilli tha se mandati i tij do të marrë fund ditën e zgjedhjeve, pasi ai ose do të bëhet kryeministër, ose do të dorëhiqet.
“T’i japim fund një politike që riprodhon në partinë tonë modelin e shekullit XX. Dua ti kërkoj një ndjesë çdo anëtari të PD pasi koha e shkurtër në dispozicion e bënë të pamundur që unë si kandidat që sfidova qetësinë kënetore të mund të shkel dhe të takojë demokratët. Turi i fitores nuk ka kalendar në 13. Data 13 është fitore brenda PD dhe më pas do të vijojë për të larguar Edi Ramën. Jam betuar për një parti më të madhe se kryetari. Kryetari është udhëheqës për 4 vite, dhe ai është ose kryeministër, ose ikën. Administrimi i partisë do duhet të bëhet nga një ‘Këshill të urtësh që kapërcen mandatin e kryetarit dhe të sigurojë zgjedhjet brenda strukturës. Parimi ‘Një anëtar, një votë’ për zgjedhjen e çdo kryetari, nga seksioni deri tek anëtari më i thjesht. Kjo do të bëhet të paktën një vit më parë nga afatet zgjedhore.”
